Útgáfur

Nýtt fyrirkomulag – greiðsluseðlar bifreiðagjalda eingöngu birtir rafrænt

5.7.2018

Fjársýsla ríkisins hefur frá því í apríl s.l. verið að vinna að innleiðingu rafrænna reikninga á bifreiðagjöldum í samvinnu við Ríkisskattstjóra og fjármála- og efnahagsráðuneytið. Um er að ræða stærstu einstöku innleiðingu á rafrænum reikningum hérlendis.

Innleiðingin  hefur það í för með sér að 1. júlí nk. verða greiðsluseðlar fyrir bifreiðagjöld einstaklinga eingöngu birtir rafrænt. Með þessu má spara 65 milljónir króna árlega og 5 tonn af pappír. Ár hvert hafa verið sendir út um 480 þúsund greiðsluseðlar vegna bifreiðagjalda.  Bifreiðaeigendur geta nú nálgast seðlana í pósthólfinu á www.island.is. og samhliða stofnast krafa í netbanka. 

Greiðsluseðlar til lögaðila, sem taka á móti rafrænum reikningum, verða sendir út rafrænt á XML formi í gegnum skeytamiðlara. Jafnframt birtist reikningur lögaðila í pósthólfinu á www.island.is og sem krafa í netbanka. Þeir lögaðilar sem ekki taka á móti rafrænum reikningum fá undanþágu við næsta gjalddaga og fá senda prentaða reikninga.

Óski einstaklingar sérstaklega eftir að fá senda útprentaða greiðsluseðla er hægt að hafa samband við innheimtumenn ríkissjóðs, Tollstjóra og Sýslumenn utan höfuðborgarsvæðisins. Þjónustuver Tollstjóra  í síma 560-0300 eða senda póst á netfangið fyrirspurn@tollur.is. Einnig er hægt að nálgast upplýsingar á tollur.is og syslumenn.is/embaettin

Álagning bifreiðagjalda fer fram 1. janúar og 1. júlí og er eindagi bifreiðagjalda 15. febrúar og 15. ágúst ár hvert.

-